اسلام آباد۔14مئی (اے پی پی):وفاقی وزیر اطلاعات و نشریات مریم اورنگزیب آکھیے جو عمران نیازی اتے انہاں دی جماعت مسیحی برادری دے مذہبی جذبات دا احترام کرن، نالائق، نااہل، فاشسٹ، کرپٹ اتے چوراں کوں عوام جلسے کیتے جاہ نی ݙیوݨ چاہندے تاں ایندے اچ حکومت کتھوں آڳئی ؟ جے عوام اناہں کوں جلسے کیتے نجی ملکیتی جاہ ݙیوݨ کوں تیار کائنی تاں ایندے اچ وزیر داخلہ رانا ثنا اللہ دا کیا قصور اے؟ عمران نیازی چاہندن جو رانا ثنا اللہ زور زبردستی نجی ملکیت تے جلسے دا بندوبست کراون ، عوام عمران خان دے غلام کائنی، حکومت قانون دے تحت او جاہ عمران نیازی کوں جلسے کیتے نی ݙے سڳدی جیڑھی جو نجی ملکیت اے۔ ہفتے کوں آپݨے ھک بیان اچ انہاں آکھیے جو مسیحی برادری اپݨی جاہ جلسے کیتے ݙیوݨ کوں تیار کائنی کیوں جو اے جاہ عبادت کیتے مختص اے۔ مریم اورنگزیب آکھیے جو عمران خان مسیحی برادری دا احترام کرن، غنڈہ گردی نہ کرن۔ انہاں آکھیے جو مسیحی کمیونٹی سراپا احتجاج اے، حکومت انہاں دے احتجاج کوں نظر انداز نی کرسڳدی ۔ انہاں آکھیے عمران نیازی مذہبی نفرت کھنڈا تے ایں جاہ کوں کیوں جلسہ کرݨ کیتے ضد تے ہن ، پی ٹی آئی کوں گورنمنٹ مرے کالج گراونڈ اتے اسپورٹس جمنازیم پسرور تے جلسہ کرݨ دی تجویز کیوں قبول کائنی ؟ ایندا صاف مطلب اے جو عمران نیازی صرف ڈرامہ کرݨ چاہندن ، انہاں دا مقصد صرف تماشہ لاوݨ اے۔
