کراچی ۔ 23 جولائی (اے پی پی)صدر مملکت ممنون حسین آکھے جو امن و امان دے مکمل قیام تئیں کراچی آپریشن جاری رکھیا ویسی ، معیشت کیتے چنگا ماحول ڈیونڑ کیتے نیشنل ایکشن پلان دے ذریعے ملکی حالات کوں چنگا کریسوں ۔ اے گالہیں انہاں چھنڑ چھنڑ کوں گورنرہائوس اچ انسٹی ٹیوٹ آف بزنس ایڈمنسٹریشن دے طلبہ اچ لیپ ٹاپ دی تقسیم دے موقعے تے تقریب نال خطاب کریندے ہوئیں آکھیاں ۔ صدر مملکت آکھیا جو اساکوں نینگراں دی مناسب تعلیم تے تربیت کیتے آپنڑیاں ساری توانائیاں اتے وسائل خرچ کرنڑ دی لوڑ ہے تانجو انہاں د مستقبل روشن تھی سگے ۔ انہاں آکھیا جو تعلیمی نصاب کوںقومی مقاصد اتے جدید دور دے تقاضیاں نال گنڈہنڑ دی لوڑ ہے ۔ایں مقصد کیتے حکومت ضروری اقدامات کریندی پئی ہے ۔ انہاں آکھیا جو پاکستان دا مستقبل نوجواناں دے مستقبل نال جڑیا ہویا ہے۔ جیہڑیاں قوماں آپنڑیں ایں فریضے نال دلوں کم کریندیاں ہن او ترقی دے دوڑ اچ پیچھویں کائنی راہندیاں۔ صدر مملکت آکھیا جو پاک چین اقتصادی راہداری منصوبے دے روٹ اچ ہک انچ دی وی تبدیلی کائنی تھئی ۔ قوم ایں بارے کہیں منفی پروپیگنڈے دا شکار نہ تھیوے ۔ انہاں آکھیا جو اقتصادی راہداری دے پورے تھیونڑ دے بعد جڈاں ملک اچ مختلف نوعیت دے کاروبار، صنعتاں، بینکاری،ذرائع نقل و حمل اتے انفارمیشن ٹیکنالوجی دی طرح دے اہم ترین شعبیاں اچ ماہراں اتے کارکناں دی لوڑ ہوسی تاں اساڈے نوجوان اے ذمہ داریاں آگوں ودھ تے سنبھال گھنسن۔ ایں سانگے لیپ ٹاپ اسکیم سمیت بیاں تعلیمی پالیسیاں کوں ایں تناظر اچ سمجھنڑ دی کوشش کیتی ونجے ۔ انہاں قوم توں درخواست کیتی جواو ملک دی اقتصادی حالت ٹھیک رکھنڑ کیتے اختیار کیتیاں گیاں پالیسیاں دی حفاظت کرن اتے بدعنوانی کوں مکاونڑ کیتے آپنڑیں ساریاں توانائیاں خرچ کرن۔ صدر مملکت آکھیا جو ماضی اچ جیکر کالا باغ ڈیم متنازع تھی گیا ہئی تاں اوں زمانے دیاں حکومتاں غیر ذمہ داری دا مظاہرہ کریندے ہوئیں کہیں نویں ڈیم دا منصوبہ کائنی بنڑایا،جیندے نال ملک کوں بہوں سارا نقصان تھئے جڈانجو ہنر نویں دیم بنڑائے ویندے پئے ہن اتے ملک دی اقتصادی بہتری کیتے درست فیصلے کیتے ویندے پئے ہن جنہاں دے مثبت نتیجے سامنڑیں امسن ۔ صدر مملکت آکھیا جواساکوں انہاں اسباب کوں مکاونڑاں ہوسی جنہاں پاروں انتہاپسندی دی طرح دے رجحانات پیدا تھیندے ہن۔
